2020-

மல்லாக்கப் படுத்து வீட்டின் மோட்டுவளையைப் பார்த்துக்கொண்டிருந்த நான் கால எந்திரத்தில் 2020-க்குப் பயணித்தால் என்ன எனத் திடீரென்று தோன்றியது. மூளையைக் கசக்கி அங்கு பத்திரிகைகளில் நான் படித்த தலைப்புச் செய்திகளே இவை.

குறிப்பு : இதில் கூறப்படும் செய்திகள் யார் மனதையும் புண்படுத்தும் நோக்கில் எழுதப்பட்டவை அல்ல; சிரித்துவிட்டு மறந்துவிடுங்கள்; சிரித்துவிட்டு சில விஷயங்களைக் குறித்துச் சிந்தித்தாலும் சரி.
தேதி : 24.9.௨0௨0
1. ஸ்பைடர்மேன் பாகம் 15 இன்று வெளியீடு
2. ஆஸ்திரேலியா எட்டாவது முறையாக உலகக்கோப்பையைக் கைப்பற்றியது.
3. ஐஸ்வர்யாராயின் ஏழாவது திருமணம் - சல்மான், விவேக், அபிஷேக் பங்கேற்பு
4. பெட்ரோல் விலை சற்றே சரிவு – விலை லிட்டருக்கு ரூ. 999 மட்டுமே.
5. சன் டிவியில் "கோலங்கள்" 4,450 வது பாகத்தைத் தொட்டது.
6. இந்தியக் கிரிக்கெட் அணியின் பயிற்சியாளர் கங்குலி தன் பதவியை ராஜினாமா செய்தார்.
7. திரிஷாவினுடைய இளைய மகள் ரஜினியின் புதிய படத்தில் கதாநாயகியாக நடிக்கிறார். படத்தின் பெயர் எம்.ஜி.ஆர்.
8. எட்டாவது முறையாக முதல்வராகப் பதவியேற்றார் 95 வயதாகும் கலைஞர் கருணாநிதி.
9. நடிகர் தனுஷுக்கும், இயக்குனர் சூர்யாவுக்கும் டாக்டர் பட்டம் வழங்கிக் கௌரவித்தது தனியார் பல்கலைக்கழகம்.
10. வரலாறு காணாத உயர்வு : பங்குச் சந்தை சென்செக்ஸ் 34,000 புள்ளிகளைத் தொட்டது.
11. மைக்ரோசாப்ட் நிறுவனர் பில்கேட்ஸ் உலகப்பணக்காரர்கள் வரிசையில் தொடர்ந்து முதலிடம். அவரது சொத்துமதிப்பு 1,00,00,00,00,00,00,000 கோடி.
12. "கிரி டிவி" – மதுரையில் புதிய டிவி சேனலை அழகிரி துவக்கினார்.
13. நான்கு வழி தேசிய நெடுஞ்சாலை வேலைகள் விரைவில் முடிவடையும். நாடாளுமன்றத்தில் அமைச்சர் உறுதி.
14. காஷ்மீர் பிரச்சினையில் விரைவில் சுமூகத் தீர்வு காணப்படும் – பிரதமர் ராகுல் காந்தி அறிக்கை.
15. சுனாமி தாக்கியதில் கலிங்கப்பட்டிக்குள் தண்ணீர் புகுந்தது. எதிரிக்கட்சிகளின் திட்டமிட்ட சதி என வைகோ முழங்கினார்.
16. சச்சின் டெண்டுல்கர் ஒருநாள் போட்டிகளில் இருந்து ஓய்வு பெறப்போவதாகத் தெரிவித்தார். ஆனால் தொடர்ந்து டெஸ்ட் போட்டிகளில் விளையாடுவார்.
17. இந்தியாவின் மக்கள்தொகை 220 கோடியை எட்டி மகத்தான சாதனை.
18. வறுமைக்கோட்டிற்குக் கீழே உள்ளவர்கள் இந்தியாவில் 43% பேர் என மத்திய மக்கள் நல்வாழ்வுத்துறை அமைச்சர் தெரிவித்தார்.
19. பின்லேடன் சுற்றி வளைக்கப்பட்டான் – அமெரிக்கா அறிவிப்பு
20. ஓசோன் படலம் தடவப்பட்ட குடைகள் அமோக விற்பனை. இக்குடைகள் விற்பனையில் ரிலையன்ஸ் முன்னிலை.
21. தக்காளியின் விலை கிலோ ஒன்றுக்கு ரூ. 220 ஆக விலை குறைந்தது. சென்ற வாரம் அது 230 ஆக இருந்தது குறிப்பிடத்தக்கது.
22. வரும் சட்டமன்றத் தேர்தலில் எங்களுக்கு ஒரு வாய்ப்புக் கொடுங்கள் – விஜயகாந்த் அறிக்கை.
23. பிரேமானந்தாவின் அப்பீல் மனுவை விசாரித்த உச்சநீதிமன்ற நீதிபதி அவர் நிரபராதி எனக் கூறி விடுவித்தார்.
24. அதிவேக பிராட்பேண்ட் இணைப்பு 95 MBPS - பி.எஸ்.என்.எல் வழங்குகிறது. மாத வாடகை ரூ. 51 மட்டுமே.
25. டாடா இண்டிகாம் தனது புதிய சலுகையை வெளியிட்டது. பத்துத் தலைமுறைக்கு வேலிடிட்டி உள்ள புதிய ப்ரீபெய்டு கார்டின் விலை ரூ. 69.

ரயிலு வண்டி காதல்

ரோசாப்பூ மனசுக்காரி

ரோசமுள்ள கோவக்காரி

ஆச வச்சேன் அவமேல

மீச வச்சேன் ஒதட்டு மேல

குளத்தங்கரைப் படிக்கட்டுல

குளிக்க வருவா

வெடலப் புள்ள

கண்ணாலம் பண்ணவான்னு

கண்ணால கேட்டுப்புட்டேன்

முட்டக் கண்ணு சிவந்திருச்சு

கெட்ட கோவம் வந்திருச்சு

தப்புக் கணக்குப் போட்டுப்புட்டா

மைனருன்னு நினைச்சுப்புட்டா

பஞ்சாயத்தக் கூட்டிப்புட்டா

பருத்திபோல வெடிச்சுப்புட்டா

ஊர் கூடி திட்டினாக

உறவெல்லாம் சிரிச்சாக

மான மருவாதி கப்பலேறியாச்சு

ரெண்டாயிரம் கப்பங் கட்டியாச்சு

அவ மேல ஆசப்பட்ட கதைய

எவகிட்ட சொல்லி அழுவ?

மண்ணுக்குள்ள வயிரம்போல

மனசுக்குள்ள காதல் கெடக்கே!

ரெண்டு நாளு பட்டினி கெடந்தேன்

பட்டணம் போக மூட்ட கட்டுனேன்

கருத்தப் புள்ளய காதலிச்ச கதய

கடுதாசியில இறக்கிவெச்சேன்

வெடுவெடுன்னு நடந்து போயி

வீசிப்புட்டேன் அவ மேல

திரும்பிக்கூடப் பார்க்காம

பதிலேதும் கேட்காம

வீறாப்பாக் கெளம்பி

வெரசா ரயிலப் புடிச்சுப்புட்டேன்

வெறப்பா வந்தாலும்

முறப்பா நின்னாலும்

உள்ளுக்குள்ள துடிதுடிக்குது

உசிருக்குள்ள அவ நினப்பு!

புகையக் கக்கிப்புட்டு

கெளம்புது செவத்த ரயிலு!

ரயிலுக்கும் எரியுமோ

என்னப்போல உள்மனசு?

கண்ண மூடி ஒக்காந்தா

கனவுல அவ முகம்

கண்ணு முழிச்சுப் பார்த்தா

எதிர்தாப்புல அவமுகம்!

கனவா நனவான்னு

தெரியாம நா(ன்) குழம்ப

முத்துப்பல்லு காட்டி

முல்லப்பூ அவ சிரிக்கா!

கண்ணால புரியாத காதல

கடுதாசியால புரிஞ்சிருக்கா

ஓன்னு அழுதிருக்கா

ஓடோடி வந்திருக்கா

தாலி கட்டப் போறேன்

தாரமாக்கப் போறேன்

பட்டணம் போயி, பத்தாயிரம்

சம்பாதிக்கப் போறேன்

கண்ணாலம் பண்ணப்போறேன்

கருத்த புள்ளகூட வாழப்போறேன்

ஏலேய் ட்ரைவரு! வெரசா ஓட்டு

இது ரயிலு வண்டியாஇல்ல கட்ட வண்டியா?

ஷில்பாவைக் கடித்த நாய்!

ஷில்பாவைக் கடித்த நாய்!

திருப்பதியில் தோழி வீட்டுக்கு வந்த இடத்தில் நடிகை ஷில்பா ஷெட்டியை தோழி வீட்டு நாய் கடித்து விட்டதாம்.கடந்த சில நாட்களாகவே தொடர் துன்பத்தில் உழன்று வருகிறார் ஷில்பா. சமீபத்தில் துபாய் சென்றிருந்தார் ஷில்பா. அங்கு அவருக்கு கடும் சளி, இருமல், நெஞ்செரிச்சல் வந்து படாதபாடுபட்டுள்ளார்.அது போதாதென்று அதற்கு முன்பு ஒரு நாயிடம் சிக்கி மீண்டுள்ளாராம் ஷில்பா.

இதுகுறித்து அவர் கூறுகையில், துபாயில் நான் இருந்தபோது கடும் சளி, நெஞ்செரிச்சல், இருமலால் பெரும் அவதிப்பட்டேன். கிட்டத்தட்ட நான்கு நாட்கள் பெரும்பாடு பட்டு விட்டேன்.அதற்கு முன்பு திருப்பதியில் உள்ள எனது தோழி வீட்டில் தங்கியிருந்த போது அவரது வீட்டு நாய் என்னைக் கடித்து விட்டது. நல்ல வேளையாக அது வீட்டு நாய் என்பதால் பிரச்சனை இல்லை.

'ரேபிஸ் எதிர்ப்பு ஊசி' எதையும் போட்டுக்கொள்ள வேண்டாம் என டாக்டர் என்னை அறிவுறுத்தினார். அதற்குப் பதிலாக 'ஆன்டி பயாட்டிக்' மருந்துகளை எடுத்துக்கொள்ளுமாறு கூறியுள்ளார்.நாய்க்கடி ஒன்றும் அவ்வளவு மோசமாக இல்லை. அதனுடைய விரல் நகங்கள், எனது ஒரு காலைப் பதம் பார்த்து விட்டது. இதனால் அந்த இடம் வீங்கி விட்டது.அது யாரையும் கடித்ததில்லையாம். ஆனால் அதன் உடம்பில் ஏற்பட்ட ஹார்மோன் கோளாறால் இப்படி செய்து விட்டதாக கூறினர்.நாய்க்கடிக்கும், சளிக்கும் தனித்தனியாக இரு 'ஆன்டி பயாட்டிக்' மருந்துகளை நான் தற்போது எடுத்து வருகிறேன்.

இந்த மருந்துகள் மிகவும் வலிமையானவை என்பதால் வயிற்றில் வலியை ஏற்படுத்தி விட்டது. இதனால் நான் மிகவும் சோர்வடைந்துள்ளேன்.இதன் காரணமாக மீண்டும் துபாய் சென்றுவிட்டு புதன்கிழமை ஊர் திரும்பியபோது விமான நிலையத்திலிருந்து என்னால் கார் வரைக்கும் நடந்து கூட வர முடியவில்லை. இதையடுத்து வீல்சேரில் என்னை அழைத்து வந்தனர். வீல் சேரில் அழைத்து வந்தது என்னை மிகுந்த மன உளைச்சலுக்கு ஆளாக்கி விட்டது.இந்த சூழ்நிலை காரணமாக துபாயில் எனது பிறந்த நாளைக் கூட நான் கொண்டாட முடியவில்லை.

என்னையே எனக்கு வெறுத்துப் போய் விட்டது என்று கூறியுள்ளார் ஷில்பா.ஷில்பான் துன்பம் ஒரு பக்கம் இருக்கட்டும். இன்னொரு சந்தோஷ செய்தியைப் பார்ப்போம். சமீபத்தில் மும்பை, அந்தேரியில், தனது தயாரிப்பு நிறுவனத்திற்காக புதிய அலுவலகத்தை வாங்கியுள்ளார் ஷில்பா.இந்த அலுவலக வளாகம், தரைத்தளம் மற்றும் முதல் தளத்தைக் கொண்டதாம். ஷில்பா, அவரது தாயார் சுனந்தா, இன்டீரியர் டிசைனர் பிரிதீஷ் ஆகியோர் இணைந்து 'இன்டீரியர் டெக்கரேஷனை' வடிவமைத்துள்ளனராம்.

இந்த அலுவலக வளாகம் 2 பெட்ரூம் கொண்ட வீடு. அதை வாங்கி அலுவலகமாக மாற்றியுள்ளனர். ஷில்பாவுக்கு பிள்ளையார் என்றால் ரொம்ப இஷ்டம். எனவே அலுவலகம் முழுவதும் விநாயகர் படங்களையும், குட்டி குட்டி சிலைகளையும் வாங்கி நிறைத்து விட்டாராம்.தனது தயாரிப்பு நிறுவனம் மூலம் வருடத்திற்கு இரு படங்களைத் தயாரிக்கத் திட்டமிட்டுள்ளாராம் ஷில்பா.