ஜெய்ப்பூரில குண்டு

சீனா பூகம்பம் பத்தி ஒரு பதிவு போட்டஉடனே இங்க ஜெய்ப்பூரில குண்டு வச்சு கிட்ட தட்ட என்பது பேருக்கு மேல உயிர் போய்டுச்சு.......என்ன கொடும சார் இது......

ஜெய்ப்பூரின் பல்வேறு இடங்களில் நேற்றிரவு நிகழ்ந்த தொடர் குண்டுவெடிப்பில் பலியானவர்களின் எண்ணிக்கை 80 ஆக உயர்ந்துள்ளது. இச்சம்பவத்தில் காயமடைந்த 150க்கும் அதிகமானோரில் பலரது நிலை கவலைக்கிடமாக உள்ளது.

ராஜஸ்தான் தலைநகர் ஜெய்ப்பூரில் நேற்றிரவு 7.20 மணியளவில் ஜோஹாரி பஜார் பகுதியில் குண்டு வெடித்தது. இதைத் தொடர்ந்து ஹனுமன் மந்திர், கோட்வாலி, திரிபோலியா பஜார், ஜோஹரி பஜார் உட்பட 6 முக்கிய இடங்களில் அடுத்தடுத்து குண்டுகள் வெடித்ததால் ஜெய்ப்பூர் நகரமே குலுங்கியது.

குண்டுவெடிப்புச் சம்பவங்களுக்கு வங்கதேசத்தில் இயங்கும் ஹர்கத்-உல்-ஜிகாதி இஸ்லாமி (ஹுஜி) என்ற தீவிரவாத அமைப்பே முக்கிய காரணமாக இருக்கும் என சந்தேகிக்கப்பதாக ராஜஸ்தான் மாநில டி.ஜி.பி. ஏ.எஸ்.கில் தெரிவித்துள்ளார். இச்சம்பவம் தொடர்பாக மும்பையைச் சேர்ந்த ஒருவரை ராஜஸ்தான் மாநில போலீசார் கைது செய்துள்ளனர்.

ஜெய்ப்பூரில் இப்படியொரு தாக்குதல் நடைபெறும் என்பதை மத்திய, மாநில உளவுப் பிரிவு போலீசார் சற்றும் எதிர்பார்க்கவில்லை என்றும் அரசு வட்டாரங்கள் கூறுகின்றன.

மக்கள் நெரிசல் அதிகமாக இருக்கும் நேரத்தையும், இடங்களையும் தேர்ந்தெடுத்து தீவிரவாதிகள் குண்டுகளை வைத்ததால், பலியானோரின் எண்ணிக்கை 80 ஆக உயர்ந்து உள்ளதாக இன்று தெரிவிக்கப்பட்டுள்ளது.